Min - Johanna Mang Bawi Ṭial
Chuahni -
31.12.1998
Pa le Nu Min: Rev.
S. Thawng Hmung & Pi Khuang Sung ( Sakta)
Umnak: Mandalay,
Myanmar
2015 ah Kawlram pumpi tanghra awnnak ah awnnak sang in
a awngmi Leng Johanna Mang Bawi Ṭial cu Sakta Youth Fellowship nih biaruahnak
kan ngeih. Anih hi min diin ah Aa Nu tiah an auhmi asi, i a nu hi Sakta asi
lawng si loin an chungkhar in Sakta ca ah ṭhatnak tampi a kan tuahpiaktu an si
fawn. Hi bantuk kanmah Sakta thisa chung in teinak a kan hmuhpiaktu cu atanglei
bantuk in online in interview kan tuah ( Biahaltu khi SYF a si i, bia lettu
khi Aa Nu ti asi lai).
 |
| A hawinu he |
SYF: Tanghra D4 a hmu tiah kan theih i kan
lung aa lawm ngai. Dinstintion pali hmuh hi naa lungsi maw? Hi `luk awnnak sang
in awn khawhnak ding ah zeitindah naa zuam?
Aa Nu: Ka si khawh tawk in kaa zuamnak cungah Pathian nih a ka pekmi a si tiah
ka zumh ca ah ka lungsi ko. Sianginn in saya te nih an kan chimhmi nikhat ca nikhat
zoh khawh, thiam khawh ding ka zuam.
SYF: Atu hi tah zei major in khoikaa
sianginn ah dah sianginn na kai lio asi? Laimi hawidang hna an um ve maw?
Aa Nu: Mandalay University ah International Relations ( COE ) ka kai lio a si.
Atutiang cu kan sianginn ah major khat Laimi hawi an um lo.
SYF: Na kaimi hi na uarmi maw si, nu le pa
duhpiakmi dah?
Aa Nu: Keimah duh te in ka thimmi major a si ko.
SYF: Aw. Ṭha tuk si. Kum zeizatdah kai asi
lai? Sianginn na dih tikah zei bantuk dah tuah awk ah chunmang na manh?
Aa Nu: Kum nga chung kai ding a si lai. Kawlram he pehtlai in ramdang ah
Diplomat ṭuan ding chunmang ka manh.
SYF: Na Sianginn kainak ah zeidah naa
harhbik?
Aa Nu: Pathian zaangfahnak thawng in ka harh tukmi cu a um lo.
SYF: Tanghra hi khoikaa ah dah na rak kai?
Aa Nu: Mandalay ah ummi The Conqueror Academy of Education ( CAE ) ah ka rak
kai.
SYF: Bia dang deuh ah, Na nule pa min le
na chungkhar kong ( Chungkhar pa zeizah nan si?) hun kan chim? Atu hi khoikaa
dah khua nan sak?
Aa Nu: Ka pa min cu Rev. S. Thawng Hmung a si, i ka nu cu Pi Khuang Sung a si.
Unau rual pali chuak kan si, i kei hi upabik ka si. Mandalay ah khua kan sa.
 |
| An chungkhar |
SYF: Naa manh caan ah zei tin caan na hman
tawn?
Aa Nu: Piano ka tum, khua maw caan ah ti kaa lio…
SYF: Laitlang kong lei deuh ah hun choi
usihlaw, Lairam hruaitu hei silaw zei bantuk dah na tuah hmasabik hnga?
Aa Nu: Lairam hruaitu hei sining law kan Lairam Infrastructure( Tlunkal nak
lam, Din ti, mei, Inn le lo ) hna hi ka sersiam hmasabik hnga.
 |
| Amah lawng |
SYF: Sakta na phan bal maw?
Aa Nu: Aw… Ka phan bal ko.
Aa Nu: Aw… Ka phan bal ko.
SYF: Sakta holh tah na thiam maw? Atheih
tah na thei maw?
Aa Nu: Atheih cu ka theih ko nain a holh tu cu ka harh deuh.
SYF: Nihin Laimi online dirhmun hi zeitin
na ruah a`ha ko na ti maw? Siloah, kan luan deuh na ti dah?
Aa Nu:
Online in i pehtlaihnak hi kan Laimi ca ah aṭha tukmi a si ko tiah ka ruah. Asinain,
Lai mino tampi nih kan ca cio ah a `hahnem ding in kan hmang kho dih rua hna lo
tiah ka ruah.
SYF: Ca lei ah, Zei bantuk ca dah na rel
bik? Kawl, Lai le Mirang ah?
Aa Nu: Kawl ca in ṭialmi cun biaknak lei kap kong ka relbik, i mirang ca tu
cun Politics lei kap kong ka rel. Kan laica tu cun Lai Baibal hi ka rel bik ko.
SYF: Lai caṭialtu lakah hodah na uarbik?
Mirang le Kawl ah tah?
Aa Nu: Laica ṭialtu lakah uarbik ti ka ngei lo. Kawl ahcun ဆိုး le Mirang ahcun Andrew Heywood le L. Frank Baum hna hi ka uar bik
hna. An ca zong kaa ken lengmang hna.
SYF: Tlaih`eng (Uarbikmi catlang) na ngei
maw?
Aa Nu: Rom 12:21 (Ṭhat lonak kha i
teiter hlah u, ṭhatnak tu in ṭhat lonak kha tei i zuam u) hi ka tlaihtleng a si.
 |
| X'mas lio |
SYF: Nang zong mino na si i mino kong ah, Mino
nih kan ngeih aherh tiah na ruahmi lungput hun kan chim kho law kan duh ko.
Aa Nu : Toidornak, Dinfelnak le Zuamnak lungput kan ngeih aherh bik tiah ka
ruah.
SYF: Cun, Mino nih hin i tinhmi (Ambition) khen khawhding zei bantuk timhtuahnak ngeih aherh tiah na ruah?
Aa Nu: Kan i tinhmi khen khawh nak ding ahcun Pathian i bochan bu in le
teirialnak lungput he izuam hi a
herh tiah ka ruah.
SYF: Lungsau te in hngalh kan duhmi na kan
leh ca ah kan I lawm tuk hringhran.
Aa Nu: Kei zong kaa lawm ve.
